F.W. de Jongh

F.W. (Francois) de Jongh (1951–) is 'n Afrikaanse digter.

Lewe en werk

Hy het aan die Universiteit Stellenbosch studeer waar hy hom as onderwyser bekwaam het. Hierna word hy 'n onderwyser op Villiersdorp.

Skryfwerk

Sy gedigte word eers in letterkundige tydskrifte soos Standpunte en Graffier gepubliseer, waarna hy debuteer met die bundel[1] Klipsweet.[2] Die titel is na aanleiding van dassies se droë urine op die rotse, wat vroeër dae as geneesmiddel gebruik is.[3] Die bundel ontgin veral die tema van die mens se stryd met die natuur en word in vier afdelings verdeel. Die eerste (Om 'n beeldjie te kap) bevat gedigte oor digterskap en Klipbok handel hoofsaaklik oor die liefde.[4] Die langste afdeling is Skape lek blink klippe, waarin die ongenaakbaarheid van die natuur belig word. Soos die afdelingtitel aandui, bevat Spoelgoed verse van uiteenlopende aard, ook oor die Suid-Afrikaanse aktualiteite van die dag. Sy gedigte word in verskeie versamelbundels opgeneem, insluitende Groot verseboek en Die Afrikaanse poësie in 'n duisend en enkele gedigte.

In 2019 verskyn sy tweede bundel getiteld Konglomeraat by Naledi Uitgewers. Die blakerteks, geskryf deur digter Daniel Hugo, sien soos volg daar uit: In Konglomeraat neem hy bestek op van ’n hele lewe. Sy ervarings as dienspligtige, onderwyser, joernalis, gesinsman, natuurliefhebber en amateur-geoloog klonter hier saam tot boeiende versgesteentes. Enkele gedigte uit sy debuutbundel is ook opgeneem om die beeld van ’n gevoelige en vaardige vakman af te rond.[5]

Publikasies.

JaarPublikasies
1981Klipsweet
2019Konglomeraat

Bronnelys

Boeke

Internet

Resensies

  1. Hugo, D.J. “Die Vaderland” 26 November 1981; Le Roux, André “Beeld” 28 September 1981
  2. Brink, André P. “Standpunte” Nuwe reeks 161, Oktober 1982
  3. Cloete, T.T. “Tydskrif vir Geesteswetenskappe” Jaargang 22 no. 2, Junie 1982
  4. Cloete, T.T. “Tydskrif vir Letterkunde” Nuwe reeks 20 no. 3, Augustus 1982
  5. https://versindaba.co.za/tag/konglomeraat/

FW de Jongh

F.W. (Francois) de Jongh (1951–) is \'n Afrikaanse digter.