Mustafa Kemal Atatürk

Kemal Atatürk (do 1934 Mustafa Kemal Paşa, osmanisce مصطفى كمال پاشا Muṣṭafâ Kemâl Paşa; * 1881 w Sołunje, Osmaniske mócnarstwo, † 10. nowembra 1938 w Istanbulu) bě turkowski oficěr a politikar, załožer po Prěnjej swětowej wójnje z Osmaniskeho mócnarstwa wušłeje Turkowskeje republiki a wot 1923 do 1938 jeje prěni prezident.

Jeho zasłužby při zakitowanju połkupy Gallipoli přećiwo aliěrowanym zwjazkarjam w lěće 1915 a wot 1921 wotwobaranski bój přećiwo Grjekam w Anatolskej sčinichu z njeho symbolisku figuru turkowskeho narodneho wědomja. Jako mócny politikar, kiž staraše so wo modernizaciju stata po zapadnym přikładźe, wo wotstronjenje sultanata a kalifata a wo daloko sahace towaršnostne reformy, je stworił moderny turkowski stat. Na to złožuje so jeho česćowanje – zdźěla we formje wosoboweho kulta – w Turkowskej hač do dźensnišeho. W lěće 1934 spožči jemu turkowski parlament oficielne mjeno Atatürk („nan Turkow“).