Die Briels

Die Briels was ’n Afrikaanse sanggroep. Frans en Sannie Briel het hulle eerste album, My gryse ou moeder, op 24 Augustus 1954 opgeneem.[1] Later was hulle bekend vir liedjies soos Drie wit kissies, Trein na Pretoria, Ter nagedagtenis aan 435 mynwerkers en Mynerslied.[2] Hulle liedjies was doelbewus somber en sentimenteel en is destyds deur die FAK as 'n verleentheid beskou. 'n SAUK-brief van 6 Augustus 1957 toon dat twee van hulle liedjies, Saans deur die tralies en Engel in die hemel, op radio verban was.

Die Briels
GenresAfrikaanse volksmusiek
Jare aktief1950's–1990's
EtiketteTroubadoer
Gewese ledeFrans Briel
Sannie Briel

Sangloopbaan

Die Briels was 'n werkersklas Afrikaanse gesin. Frans het op die spoorweë en later vir Yskor gewerk, terwyl Sannie 'n vurkhyser bestuur het. Die realiteite van 'n werkersklas-lewe het dikwels in hul musiek tot uiting gekom. Hulle het die koerante vir nuus oor rampe deursoek, wat as temas vir nuwe liedjies ingespan is. Hierdie swaar onderwerpe was destyds gewild en die albums het goed onder ouer luisteraars verkoop, terwyl jongmense nie regtig na Afrikaanse musiek geluister het nie. Ondanks hul goeie verkope het Die Briels arm gebly. Kunstenaars het nie tantième ontvang nie en 'n vaste fooi is vir opnames betaal.[3]

In 1961 stel hulle Die Mynerslied vry, geïnspireer deur die Coalbrook-mynramp van Januarie 1960, waarin 435 mynwerkers omgekom het (waarvan 429 swart trekarbeiders uit Lesotho en Mosambiek). Liedjies soos Ter nagedagtenis aan 435 Mynwerkers en Mynerslied was 'n somber herinnering aan hierdie tragedie, maar was uiters gewild in 'n tyd waarin ander Afrikaanse musiek meestal lighartig was. Hoewel die Sharpeville-slagting slegs 'n paar maande na die Coalbrook-ramp plaasgevind het, is dit nie in 'n liedjie verwerk nie.

In die 1980's het die Die Briels se musiek, saam met die alternatiewe Afrikaanse musiek van die tyd, 'n herlewing beleef. Frans is in 1985 en Sannie in 1996 oorlede.

Trein na Pretoria

Die Trein na Pretoria is Die Briels se bekendste treffer. Dis 'n treurige verhaal van 'n meisie wat vir haar sterwende ma in Pretoria wil gaan kuier. Sy het egter nie geld om vir die treinkaartjie te betaal nie en die kondukteur besluit om haar te help. Die liedjie is in 2015 deur Maroela Media tydens hulle Grootste Afrikaanse Liedjie van Alle Tye-veldtog as een van die top 10 treffers in die tradisionele kategorie benoem.[4]

Verwysings

  1. Volgens Sannie Briel is dit die datum van hulle eerste album. Ander bronne vermeld dit as 1956, met die kortspeler Sentimentele wysies. I. Roggeband, 50 Stemme: Diegrootste name in Afrikaanse musiek (Kaapstad: Delta, 2009), p. 39. ISBN 978-0-908387-90-8
  2. HAT Taal-en-feitegids, Pearson, Desember 2013, ISBN 978-1-77578-243-8
  3. Van der Merwe, Schalk Daniël. The dynamics of the interaction between music and society in recorded popular Afrikaans music, 1900–2015. Universiteit Stellenbosch
  4. Nuwe vrystelling: Die Grootste Afrikaanse Liedjie-CD, Maroela Media, 24 April 2015

Eksterne skakels


Die Briels

Die Briels was ’n Afrikaanse sanggroep. Frans en Sannie Briel het hulle eerste album, My gryse ou moeder, op 24 Augustus 1954 opgeneem. Later was hulle bekend vir liedjies soos Drie wit kissies, Trein na Pretoria, Ter nagedagtenis aan 435 mynwerkers en Mynerslied. Hulle liedjies was doelbewus somber en sentimenteel en is destyds deur die FAK as \'n verleentheid beskou. \'n SAUK-brief van 6 Augustus 1957 toon dat twee van hulle liedjies, Saans deur die tralies en Engel in die hemel, op radio verban was.