Sandra Bullock
Sandra Annette Bullock (* 26. Juli 1964 in Arlington, Virginia, USA) is en US-amerikaansche Schauspelerin.
Foto: Angela George
Leven un WarkÄnnern
Sandra Bullock weer 1964 as Sandra Annette Bullock in den US-amerikaanschen Bundsstaat Virginia boren. Ehr Mudder weer de düütsche Opernsingerin Helga Meyer, de an’n 4. April 2000 doodbleeven is. Ehr Vadder is de US-amerikaansch Gesangschoolmeester John Bullock. Tohopen mit ehr jüngeren Süster Gesine, stünn Sandra Bullock in’n Kinnerchor vun en Oper op, wiel jemehr Mudder speelt hett. De eersten twölf Johren hett se sik faken in Nürnbarg ophollen, wo se de Waldörpschool besocht hett, aver ok in Soltborg un Wien. Se kann dorüm teemlich goot Düütsch snacken mit en lichten frankschen Akzent, man ut enige Interviews is bekannt, dat se dat nich geern doon mag vun wegen ehr slecht Grammatik. Dorüm hett se ok noch nie en längeret Interview op Düütsch geven.
An ehr Highschool weer se Kaptein vun de Cheerleaders. Na de Highschool hett Bullock de East Carolina University in’n Bundstaat North Carolina besocht, wo se Schauspeel studeert hett. Dat Studium hett se aver afbroken, üm lever in New York City praktisch Insichten in de Schauspeleree to winnen. Dat weer aver nich so eenfach, as se dacht hett. So hett se ok en Tiet as Kellnerin arbeidt, bevör se bi Sanford Meisner ehr Utbilln to End maakt hett. Dorna güng se na Los Angeles, wo se en poor lütte Film- un Fernsehrullen speelt hett.
Ehr eerste grote Rull keem 1993 in den Film Demolition Man, wo se an de Siet vun Wesley Snipes un Sylvester Stallone en Polizistin speelt hett. Dormit is se in Hollywood bekannt worrn. De Dörbrook keem man een Johr later in den Film Speed mit Keanu Reeves un Dennis Hopper. Siet de Tiet is se faken in Hollywoodfilmen to sehn wesen, wo se sik vör allen in romantische Kummedien as eerstklassige Dorstellersche en Naam maakt hett.
Sandra Bullock hett mehrere Johren versocht, Geldgevers to finnen för en Drama üm en Boxerin – ahn Spood. Man de Achtergrund weer 2004 denn ünner den Titel Million Dollar Baby ahn Mitwarken vun Bullock vun Clint Eastwood mit Hilary Swank in de Hööftrull ümsett. Bullock hett dorna verkloort, dat se, as to höörn weer, de Rull nich aflehnt harr. Hilary Swank kreeg dorför ehrn tweeten Oscar.
Ehrn gröttsten künstlerischen Spood harr Bullock mit den Film The Blind Side, in den se de Hööftrull speelt hett. För disse Rull is se 2010 ünner annern mit den Golden Globe un mit den Oscar uttekent worrn. In dat glieke Johr hett se ok de Goldene Himbeer as slechtste Schauspelerin för All About Steve kregen. As een vun de wenigen Dorstellers, hett se den Negativ-Pries sülvst bi de Verlehen afhollt.
Bullock leeft in Austin (Texas). Siet den 16. Juli 2005 is se mit den Moderater vun „Monster Garage“ un Biker Jesse G. James verheiraat. Se hett en egen Produktschoonsfirma mit den Naam Fortis Films, vun de ehr Süster Gesine Bullock-Prado de Vize-Präsidentin is. In’n November 2006 hett se butendem in Austin en Nobelrestaurant mit den Naam BESS apenmaakt. In de Johren 1996 un 1999 is Sandra Bullock vun dat US-Magazin People ünner de 50 schönsten Minschen op de Welt wählt worrn.
Sandra Bullock hett in mehr as 40 Filmen mitspeelt. Ehr düütsche Synchronsnackerin vun Sandra Bullack is tomeist Bettina Weiß. Bito hett se mehr as teihn Filmen produzeert un weer bi den Film Making Sandwiches, för den se dat Dreihbook schreven hett, ok al Speelbaas.
Filmrullen (Utwahl)Ännern
| Johr | Titel | Synchroonsnacker |
|---|---|---|
| 1987 | Hangmen | |
| 1992 | Love Potion No. 9 dt.: Love Potion No. 9 – Der Duft der Liebe | Marion Elskis |
| 1993 | The Vanishing dt.: Spurlos | Maud Ackermann |
| 1993 | Wrestling Ernest Hemingway dt.: Walter & Frank – Ein schräges Paar | Bettina Weiß |
| 1993 | Demolition Man | Bettina Weiß |
| 1994 | Who Do I Gotta Kill? dt.: Wo bitte geht’s zur Mafia? | Bettina Weiß |
| 1994 | Speed | Bettina Weiß |
| 1995 | The Net dt.: Das Netz | Michaela Geuer |
| 1995 | While You Were Sleeping dt.: Während Du schliefst | Bettina Weiß |
| 1996 | A Time to Kill dt.: Die Jury | Bettina Weiß |
| 1996 | Two If by Sea dt.: Gestohlene Herzen | Bettina Weiß |
| 1997 | Speed 2: Cruise Control dt.: Speed 2 – Cruise Control | Bettina Weiß |
| 1998 | Practical Magic dt.: Zauberhafte Schwestern | Bettina Weiß |
| 1999 | Forces of Nature dt.: Auf die stürmische Art | Bettina Weiß |
| 2000 | Miss Congeniality dt.: Miss Undercover | Bettina Weiß |
| 2000 | 28 Days dt.: 28 Tage | Nana Spier |
| 2002 | Two Weeks Notice dt.: Ein Chef zum Verlieben | Bettina Weiß |
| 2002 | Divine Secrets of the Ya-Ya Sisterhood dt.: Die Göttlichen Geheimnisse der Ya-Ya Schwestern | Bettina Weiß |
| 2002 | Murder by Numbers dt.: Mord nach Plan | Bettina Weiß |
| 2005 | Miss Congeniality 2: Armed & Fabulous dt.: Miss Undercover 2 | Bettina Weiß |
| 2006 | Infamous | |
| 2006 | The Lake House dt.: Das Haus am See | Bettina Weiß |
| 2007 | Premonition dt.: Die Vorahnung | Bettina Weiß |
| 2009 | All About Steve dt.: Verrückt nach Steve | Bettina Weiß |
| 2009 | The Proposal dt.: Selbst ist die Braut | Bettina Weiß |
| 2009 | The Blind Side dt.: Blind Side – Die große Chance | Bettina Weiß |
| 2011 | Extremely Loud & Incredibly Close dt.: Extrem laut und unglaublich nah | Bettina Weiß |
| 2013 | The Heat dt.: Taffe Mädels | Bettina Weiß |
| 2013 | Gravity | Bettina Weiß |
| 2015 | Minions, Stimm | Carolin Kebekus |
| 2015 | Our Brand Is Crisis dt.: Die Wahlkämpferin | Bettina Weiß |
UttekenÄnnern
Sandra Bullock is bit nu (Juni 2014) mit mehr as 50 Priesen uttekent worrn un för mehr as sösstig annere nomineert wesen. Siet 2005 is Sandra Bullock ok mit en Steern op’n Walk of Fame verewigt.
En Utwahl vun de Filmpriesen, de se wunnen hett:
- 1995: den Saturn Award as Best Schauspelerin för Speed.
- 1995: den MTV Movie Award as Beste Dorstellerin för Speed.
- 1995: den Golden Apple as Dorstellerin vun’t Johr.
- 1996: den ShoWest Award as Dorstellerin vun’t Johr.
- 1997: den Blockbuster Entertainment Award as Beste Schauspelerin, Spannung för A Time to Kill.
- 1999: den Joseph-Plateau-Filmprijs (Ehrenpries)
- 2000: den Bambi in de Kategorie Film – Internatschonal.
- 2001: den ShoWest Award as Dorstellerin vun’t Johr.
- 2001: den American Comedy Award as Lustigste Hööftdorstellerin in en Film för Miss Congeniality.
- 2004: den Virginia Film Award vun’t Virginia Film Festival.
- 2005: den Crystal Award vun de Women in Film Crystal Awards.
- 2005: ehrn Steern op’n Walk of Fame
- 2006: den Hollywood Film Award as Beste Nevendorstellerin vun’t Johr
- 2010: de Golden Himbeer in de Kategorie Slechtste Dorstellerin för All About Steve
- 2010: den Golden Globe in de Kategorie Beste Hööftdorstellerin – Drama för The Blind Side
- 2010: den Oscar in de Kategorie Best Hööftdorstellerin för The Blind Side
- 2012: den Teen Choice Award in de Kategorie Schauspelersche – Drama för Extremely Loud & Incredibly Close
- 2013: den Hollywood Film Award as Beste Hööftdorstellerin vun’t Johr för Gravity
LiteraturÄnnern
- Adolf Heinzlmeier: Sandra Bullock. Hollywoods neues Gesicht. Heyne, München 1997, ISBN 3-453-12622-X (hoochdüütsch)
WebstedenÄnnern
- Sandra Bullock in de Internet Movie Database (engelsch)
